დონალდ ტრამპის საკუთრებაში არსებული გოლფის მოედანი "თერნბერი" პროპალესტინურმა ჯგუფმა დააზიანა

შოტლანდიაში, დონალდ ტრამპის კუთვნილ გოლფის კლუბ "თერნბერიში" ინციდენტი მოხდა. პროპალესტინურმა ჯგუფმა, სახელწოდებით "Palestine Action", კლუბის ტერიტორიაზე მდებარე შენობები წითელი საღებავით დააზიანა.

სოციალურ ქსელში გავრცელებულ ფოტოებზე ჩანს, რომ ერთ-ერთ მოედანზე წარწერაა გაკეთებული: "ღაზა გასაყიდად არ არის". ასევე, დაზიანებულია ერთ-ერთი მოედანი და განათების ბოძი. ტრამპის ორგანიზაციის წარმომადგენელმა მომხდარი "ბავშვურ და კრიმინალურ აქტად" შეაფასა.

შოტლანდიის პოლიცია მომხდართან დაკავშირებით გამოძიებას აწარმოებს.

ცნობილია, რომ დონალდ ტრამპმა არაერთხელ გამოთქვა საკამათო წინადადება ღაზას სექტორიდან პალესტინელების სრული ევაკუაციის და ამ ტერიტორიის კურორტად გადაქცევის შესახებ, რამაც საერთაშორისო კრიტიკა გამოიწვია. ტრამპმა განაცხადა, რომ აშშ-ს შეუძლია ღაზას სექტორის კონტროლი და მისი რეკონსტრუქცია.

გოლფის მოედანი "თერნბერი" მსოფლიოში ერთ-ერთ საუკეთესოდ ითვლება. მას ოთხჯერ უმასპინძლია "The Open Championship"-ს.

"თერნბერი" ტრამპმა 2014 წელს შეიძინა და მას შემდეგ ტურნირი არ ჩატარებულა. შესყიდვის შემდეგ, კურორტს მასშტაბური რეკონსტრუქცია ჩაუტარდა. ეს ტრამპის ორგანიზაციის მეორე გოლფის კურორტია შოტლანდიაში. პირველი, "Trump International Golf Links", აბერდინის ჩრდილოეთით 2012 წელს გაიხსნა.

ტრამპმა შოტლანდიაში გოლფის მოედნის აშენება დედის ხსოვნას მიუძღვნა, რომელიც კუნძულ ლუისზე დაიბადა და გაიზარდა.

"Palestine Action" საკუთარ თავს "ისრაელის აპარტეიდში ბრიტანეთის თანამონაწილეობის დემონტაჟის პირდაპირი მოქმედების ქსელს" უწოდებს. ჯგუფის განცხადებაში ნათქვამია, რომ ისინი ეწინააღმდეგებიან დონალდ ტრამპის დამოკიდებულებას ღაზას მიმართ, თითქოს ეს მისი საკუთრება იყოს, რომელსაც ის თავისი შეხედულებისამებრ განკარგავს. მათი თქმით, ამის საჩვენებლად მათ დაანახეს, რომ მისი საკუთრებაც არ არის დაცული წინააღმდეგობის აქტებისგან და რომ ისინი გააგრძელებენ მოქმედებას პალესტინის სამშობლოში აშშ-ისრაელის კოლონიალიზმის წინააღმდეგ.

პოლიციის განცხადებით, ინციდენტის შესახებ შეტყობინება 8 მარტს, დილის 04:40 საათზე შევიდა. გამოძიება მიმდინარეობს.