ძიუდოისტმა ჯეიდ ჯონსმა ტაეკვონდო კრივიში გაცვალა

უელსელი ორგზის ოლიმპიური ჩემპიონი ტაეკვონდოში, ჯეიდ ჯონსი, სპორტის სახეობას იცვლის და კრივში გადადის. 31 წლის სპორტსმენი აცხადებს, რომ "დიდ ოცნებებს მისდევს" და ორი სპორტის სახეობაში მსოფლიო ჩემპიონი გახდომას გეგმავს.

ჯონსი უკვე ორი თვეა კრივს მისდევს და ყოფილ პროფესიონალ მოკრივე სტივენ სმიტთან ვარჯიშობს. ის ამ ნაბიჯს უპრეცედენტოდ მიიჩნევს და პროფესიონალურ კარიერას გეგმავს.

"ეს ნერვების მომშლელია. ზოგჯერ ვიღვიძებ და ვფიქრობ, ნამდვილად ჭკუიდან ხომ არ შევიშალე?" - განაცხადა ჯონსმა ერთ-ერთ ინტერვიუში. "მაგრამ ძალიან მომწონს. მიყვარს ტაეკვონდო, ის ყოველთვის ჩემი პირველი სიყვარული იქნება. მაგრამ ეს საინტერესო გამოწვევაა. ამას მხოლოდ ორი თვეა ვაკეთებ."

ჯონსის ეს გადაწყვეტილება ბევრ კითხვას ბადებს, რადგან მან ორი ათწლეული გაატარა სპორტში, სადაც მოწინააღმდეგისათვის ფეხის დარტყმა თამაშის მთავარი წესია. ჯონსი აღიარებს, რომ მისი გადაწყვეტილება მოულოდნელი იყო.

"არ ვიცი, რა მომივიდა თავში. სამზარეულოში ვიჯექი და უცებ გავიფიქრე, კრივს ვცდი-მეთქი. ჩემს ოჯახს გიჟი ვგონივარ, მაგრამ ვინც მიცნობს, იცის, რომ ეს ჩემშია, მიყვარს ჩხუბი და ბრძოლა", - თქვა მან. "ხალხს შეუძლია თვალი ადევნოს ჩემს მოგზაურობას, კარგს, ცუდს და საშინელს. შევძლებ კი მწვერვალზე ასვლას? დავმარცხდები? ოცნება მსოფლიო ჩემპიონი გახდომაა. ორი სპორტის სახეობაში მსოფლიო ჩემპიონი ყოფნა ძალიან მაგარი იქნება."

ჯონსი აღიარებს, რომ კულტურული შოკი განიცადა, როდესაც კრივის "ტკბილი მეცნიერების" შესწავლა დაიწყო. "კრივი, ალბათ, ყველაზე რთული სპორტია მსოფლიოში, მაგრამ გამოწვევისთვის მზად ვარ, მინდა ვცადო", - თქვა მან. "ტექნიკა ყველაზე რთული სასწავლია. ამდენი პატარა ფაქტორია. თავიდან პირდაპირ შევვარდი, მაგრამ ყველაფერი დროისა და მოთმინების საკითხია. მაშინვე მივხვდი, რომ ეს არ არის "როკი ბალბოა", უბრალოდ ვერ შეხვალ და ყველას ვერ გაანადგურებ. მეგონა, რომ მაგარი ვარ და შემიძლია ჩხუბი, მაგრამ სიმართლე გითხრათ, სულ სხვაგვარადაა. ტაეკვონდოს მსგავსია, ჭადრაკის თამაშია, ოღონდ ხელებით."

ორი ოლიმპიური ოქროს მედლის გარდა, ჯეიდ ჯონსმა მოიგო მსოფლიო ჩემპიონატი, სამი ევროპის ჩემპიონატი და 10 გრან-პრის ტიტული ტაეკვონდოში.

უელსის ერთ-ერთი ყველაზე წარმატებული ოლიმპიელი, ჯონსი აღიარებს, რომ ტაეკვონდოს დატოვება სევდას იწვევს, რადგან მან ოთხ ოლიმპიადაზე წარადგინა დიდი ბრიტანეთის გუნდი და მოიპოვა ორი ოქროს მედალი, ასევე მოიგო მსოფლიო ჩემპიონატი.

ჯონსი გახდა დიდი ბრიტანეთის გუნდის ყველაზე ახალგაზრდა ოლიმპიური ოქროს მედლის მფლობელი, როდესაც სენსაციურად მოიგო ოქრო პირველივე ცდაზე, 19 წლის ასაკში, 2012 წლის ლონდონის თამაშებზე და შეინარჩუნა ტიტული ოთხი წლის შემდეგ რიო-დე-ჟანეიროში.

2020 წლის ტოკიოს თამაშებზე იმედგაცრუება მოჰყვა, რაც მოგვიანებით მან თავის კარიერაში "ყველაზე დიდ დაცემად" შეაფასა. 2024 წლის პარიზის ოლიმპიადაზე ჯონსის ბრძოლა ოლიმპიური ისტორიის შესაქმნელად ტაეკვონდოს -57 კგ წონით კატეგორიაში პირველ რაუნდში მარცხით დასრულდა. ის ცდილობდა გამხდარიყო პირველი სამგზის ოლიმპიური ჩემპიონი ამ სპორტის ისტორიაში და მარცხმა ჯონსი "გაანადგურა".

ჯონსმა წააგო მაკედონიელ მილანა რელიკიჯთან რეგისტრირებული დარტყმების რაოდენობით, რომელიც ფრედ დასრულებული სამი რაუნდის შემდეგ გამოიყენეს, როგორც ტაი-ბრეიკერი.

ჯონსმა ახლა გადაწყვიტა დაეტოვებინა სპორტი, რომელიც უყვარს. "ჩემი ოჯახი ცოტათი მოწყენილია, რომ ტაეკვონდოს ვტოვებ", - დასძინა მან. "არასდროს გამომიყენებია ხელები. 20 წლის შემდეგ, რაც ფეხებს ვიყენებდი, ყველაფერს ვცვლი. კრივი ჩემთვის კარგია. თავიდან ეს უბრალოდ ყურადღების გადატანის საშუალება იყო, მაგრამ ახლა ვაპირებ ბოლომდე წავიდე, რადგან ძალიან მომწონს."

ჯონსის მწვრთნელმა სმიტმა, რომელმაც ორჯერ იბრძოლა მსოფლიო ტიტულისთვის, აღიარა, რომ თავდაპირველად სკეპტიკურად იყო განწყობილი ჯონსის კრივის ამბიციების მიმართ. "ჩემი პირველი ინსტინქტი იყო, რატომ? რატომ უნდა გადავიდეს ადამიანი, რომელიც ორივე ფეხით ურტყამს, სპორტში, სადაც ხელებს იყენებ?", - თქვა მან. "მასში ეჭვი არ მეპარებოდა, მაგრამ დაბნეული ვიყავი. არ მგონია, რომ ეს ოდესმე მომხდარიყო, არ ვიცი არავინ, ვინც ტაეკვონდოდან მოვიდა. ეს უდიდესი გამოწვევაა, მაგრამ მისი დამოკიდებულება ამარტივებს... ის სულ უფრო და უფრო უმჯობესდება."