ერაყსა და სირიაში "ისლამური სახელმწიფოს" ერთ-ერთი ლიდერი ლიკვიდირებულია

ერაყის პრემიერ-მინისტრის განცხადებით, ერაყის ეროვნული სადაზვერვო სამსახურისა და აშშ-ის ხელმძღვანელობით მოქმედი კოალიციის ძალების მიერ ჩატარებული ოპერაციის შედეგად, ერაყსა და სირიაში მოქმედი ტერორისტული დაჯგუფება "ისლამური სახელმწიფოს" ერთ-ერთი მაღალი რანგის ლიდერი განეიტრალებულია.

აბდალა მაკი მუსლიჰ ალ-რიფა, იგივე აბუ ხადიჯა, ერაყის პრემიერ-მინისტრის შეფასებით, "ერაყისა და მთელი მსოფლიოს ერთ-ერთ ყველაზე საშიშ ტერორისტად" ითვლებოდა.

აშშ-ის ცენტრალურმა სარდლობამ (Centcom) სოციალურ ქსელ X-ზე გამოაქვეყნა ვიდეო, რომელიც, სავარაუდოდ, ოპერაციის ამსახველია და რომელიც ერაყის დასავლეთ პროვინცია ანბარში ხუთშაბათს განხორციელდა.

ცენტრალური სარდლობის ინფორმაციით, აბდალა მაკი მუსლიჰ ალ-რიფა "ისლამური სახელმწიფოს" უმაღლესი გადაწყვეტილების მიმღები ორგანოს ხელმძღვანელი იყო და პასუხისმგებელი იყო დაჯგუფების მიერ გლობალურად განხორციელებულ ოპერაციებზე, ლოგისტიკასა და დაგეგმვაზე. გარდა ამისა, იგი ხელმძღვანელობდა დაჯგუფების გლობალური ორგანიზაციის ფინანსების მნიშვნელოვან ნაწილს.

ცენტრალური სარდლობის განცხადებით, აბდალა მაკი მუსლიჰ ალ-რიფა კიდევ ერთ "ისლამური სახელმწიფოს" მებრძოლთან ერთად იქნა ნაპოვნი. ორივე მათგანს ეცვა აუფეთქებელი "მოწამეობრივი ქამარი" და თან ჰქონდათ მრავალი სახის იარაღი.

ცენტრალურმა სარდლობამ და ერაყის ძალებმა მისი იდენტიფიცირება დნმ-ის ანალიზის საფუძველზე შეძლეს, რომელიც წინა რეიდის დროს იქნა მოპოვებული, როდესაც მან "სულ მცირე მანძილით აიცილა თავიდან დატყვევება".

გენერალმა მაიკლ ერიკ კურილამ განაცხადა, რომ აბუ ხადიჯა "მთელი გლობალური ორგანიზაციის ერთ-ერთი ყველაზე მნიშვნელოვანი წევრი იყო". მისივე თქმით, ისინი გააგრძელებენ ტერორისტების განადგურებას და იმ ორგანიზაციების დემონტაჟს, რომლებიც საფრთხეს უქმნიან მათ სამშობლოს, აშშ-ს, მოკავშირეებსა და პარტნიორებს რეგიონში და მის ფარგლებს გარეთ.

ცნობისთვის, "ისლამურ სახელმწიფოს" ოდესღაც 88 000 კვადრატული კილომეტრის ტერიტორია ეკავა, რომელიც ჩრდილო-აღმოსავლეთ სირიიდან ჩრდილოეთ ერაყამდე იყო გადაჭიმული და თითქმის რვა მილიონ ადამიანზე ახორციელებდა სასტიკ მმართველობას.

ერაყმა "ისლამური სახელმწიფოს" დამარცხება 2017 წლის დეკემბერში გამოაცხადა, ხოლო დაჯგუფება 2019 წელს გააძევეს მის მიერ კონტროლირებადი უკანასკნელი ტერიტორიიდან. თუმცა, მებრძოლები და "მძინარე უჯრედები" კვლავაც ინარჩუნებენ არსებობას ქვეყნის სხვადასხვა ნაწილში და პერიოდულ თავდასხმებს ახორციელებენ ერაყის არმიისა და პოლიციის წინააღმდეგ.