გავრცელებული ინფორმაციით, დენ ეშუორთი, რომელიც წარსულში "მანჩესტერ იუნაიტედის" სპორტული დირექტორი იყო, ინგლისის ფეხბურთის ასოციაციასთან თანამშრომლობის განახლების თაობაზე მოლაპარაკებებს აწარმოებს.
საუბარია იმაზე, რომ ეშუორთს შესაძლოა დაეკისროს მამაკაცთა და ქალთა ტექნიკური ოპერაციების ზედამხედველობა, ასევე წმინდა გიორგის პარკის, სადაც ინგლისის ყველა ნაკრები ვარჯიშობს, განახლების შემდეგ ეტაპზე მონიტორინგი.
ცნობილია, რომ ეშუორთი 2012-დან 2018 წლამდე უკვე მუშაობდა ფეხბურთის ასოციაციაში. მისი შესაძლო დაბრუნების შემთხვევაში, ერთ-ერთი მთავარი ამოცანა ადგილობრივი მწვრთნელების განვითარება იქნება. აღსანიშნავია, რომ პრემიერ ლიგაში ამჟამად მხოლოდ ორი ინგლისელი მწვრთნელი მუშაობს, რაც პრობლემად მიიჩნევა.
ფეხბურთის ასოციაციის ტექნიკური დირექტორი, ჯონ მაკდერმოტი, სავარაუდოდ, თავის პოსტზე დარჩება. თავად ასოციაციას ამ საკითხზე კომენტარი ჯერ არ გაუკეთებია.
ცნობისთვის, "მანჩესტერ იუნაიტედმა" ეშუორთის დაქირავებასა და გათავისუფლებაში 4.1 მილიონი ფუნტი სტერლინგი გადაიხადა. კლუბი არ აკონკრეტებს, შემცირდება თუ არა ეს თანხა, თუ ეშუორთი ფეხბურთის ასოციაციაში დაბრუნდება.
გარდა ამისა, ცნობილია, რომ ეშუორთი უორვიკშირის საგრაფო კრიკეტის კლუბს საკონსულტაციო დახმარებას უწევს. თუმცა, ეს თანამდებობა ანაზღაურებას არ ითვალისწინებს და 2021 წელს დაიწყო.
შეგახსენებთ, რომ გარეთ საუთგეიტი ინგლისის ნაკრების მთავარ მწვრთნელად 2016 წელს დაინიშნა და გუნდი 2018 წლის მსოფლიო ჩემპიონატის ნახევარფინალში გაიყვანა, ხოლო 2021 და 2024 წლების ევროპის ჩემპიონატებზე ფინალში ითამაშა.
სანამ ეშუორთი ფეხბურთის ასოციაციაში მუშაობდა, ინგლისის ქალთა ნაკრებიც მსოფლიო ჩემპიონატის ნახევარფინალში გავიდა. 2018 წლის მსოფლიო ჩემპიონატის შემდეგ, ეშუორთმა ასოციაცია დატოვა და "ბრაიტონის" ტექნიკური დირექტორი გახდა, სანამ 2022 წელს "ნიუკასლში" სპორტული დირექტორის პოსტს დაიკავებდა. "მანჩესტერ იუნაიტედმა" მისი გადაბირება მოახერხა, თუმცა ეშუორთმა "ოლდ ტრაფორდზე" მხოლოდ ხუთი თვე გაატარა.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს