ჰოლივუდის რეჟისორს Netflix-ისგან 11 მილიონი დოლარის თაღლითობაში ადანაშაულებენ

ცნობილი ჰოლივუდის რეჟისორი დააკავეს. მას ბრალად ედება სტუდიის სახსრების არამიზნობრივი გამოყენება. ეს თანხები განკუთვნილი იყო სამეცნიერო ფანტასტიკური ჟანრის სერიალის დასასრულებლად, თუმცა რეჟისორმა ისინი ფუფუნების საგნების, მათ შორის ძვირადღირებული ავტომობილების, კრიპტოვალუტის და მდიდრული საწოლის თეთრეულის შესაძენად გამოიყენა.

47 წლის კარლ ერიკ რინშს ბრალი ედება ფედერალურ თაღლითობაში და ფულის გათეთრებაში, რაც უკავშირდება Netflix-ის მიერ მისთვის გადაცემულ 11 მილიონ დოლარს სერიალის, სახელწოდებით "თეთრი ცხენი", შესაქმნელად.

ლოს-ანჯელესის სასამართლოში წარდგენისას, ბატონმა რინშმა, რომელიც ცნობილია 2013 წლის ფილმით "47 რონინი", ბრალდებაზე პასუხის გაცემაზე უარი განაცხადა.

ბრალდებაში კონკრეტულად Netflix არ არის დასახელებული, არამედ მოხსენიებულია, როგორც "მოთხოვნაზე დაფუძნებული ვიდეო ნაკადის სერვისი". თუმცა, რინშის ხანგრძლივი დავა Netflix-თან წარუმატებელი სერიალის გამო, ადრეც იყო გაშუქებული ამერიკულ მედიაში. Netflix-ს მომხდარზე კომენტარი არ გაუკეთებია.

2018-დან 2019 წლამდე, სტრიმინგის გიგანტმა რინშს 44 მილიონი დოლარი გამოუყო სერიალის გადასაღებად, რომელიც ხელოვნური ადამიანის კლონების შესახებ მოგვითხრობს, თუმცა, პროკურორების განცხადებით, მან ვერც ერთი ეპიზოდი ვერ დაასრულა.

2020 წლის მარტში, Netflix-მა მას კიდევ 11 მილიონი დოლარი გადაურიცხა, მას შემდეგ, რაც რეჟისორმა განაცხადა, რომ საწყისი ბიუჯეტი "საკმარისი არ იყო".

სამართალდამცავების მტკიცებით, თანხის სერიალისთვის გამოყენების ნაცვლად, რეჟისორმა ის პირად საბანკო ანგარიშებზე გადარიცხა და რამდენიმე სარისკო ფინანსურ წამოწყებაში ჩადო.

პროკურორმა მეთიუ პოდოლსკიმ განაცხადა, რომ კარლ ერიკ რინშმა მოაწყო სქემა მილიონების მოსაპარად, როდესაც ვიდეო სტრიმინგის სერვისისგან დიდი ინვესტიცია მოითხოვა და განაცხადა, რომ თანხა ტელევიზიის შოუს დაფინანსებას მოხმარდებოდა, რომელსაც ის ქმნიდა. თუმცა, ეს ყველაფერი ფიქცია აღმოჩნდა.

ბრალდების თანახმად, 11 მილიონი დოლარის მიღებიდან სულ რაღაც ორ თვეში, თანხის ნახევარი უკვე დახარჯული იყო.

სანამ რეჟისორი ფულს კარგავდა, Netflix-ს ატყობინებდა, რომ შოუ "საოცარია და ძალიან კარგად მიიწევს წინ".

სასამართლო დოკუმენტების თანახმად, მან დარჩენილი თანხა კრიპტოვალუტაში სპეკულირებისთვის, პირად ხარჯებზე და ფუფუნების საგნებზე დახარჯა, მათ შორის Rolls-Royce-ისა და Ferrari-ის ავტომობილებზე.

იუსტიციის დეპარტამენტის განცხადებით, ხარჯებში ასევე შედიოდა 1.8 მილიონი დოლარი საკრედიტო ბარათების გადასახადებზე, 3.7 მილიონი დოლარი ავეჯსა და ანტიკვარიატზე და 933,000 დოლარი ლეიბებსა და მდიდრულ საწოლის თეთრეულზე.

ბრალდებაში ასევე ნათქვამია, რომ თანხის 1 მილიონი დოლარი ადვოკატებთან გაიგზავნა Netflix-ის წინააღმდეგ სარჩელის შესატანად, მეტი თანხის მიღების იმედით, ასევე განქორწინებისთვის.

New York Times-ში 2023 წელს გამოქვეყნებულ სტატიაში აღნიშნულია, რომ მეგობრებმა და კოლეგებმა განაცხადეს, რომ Netflix-თან გარიგების გაფორმების შემდეგ, რინში სულ უფრო არასტაბილური ხდებოდა.

გაზეთის ცნობით, მას სჯეროდა, რომ ელვის დარტყმისა და ვულკანური ამოფრქვევის წინასწარმეტყველება შეეძლო და იცოდა Covid-19-ის "საიდუმლო გადაცემის მექანიზმის" შესახებ.

Associated Press-ის ინფორმაციით, რინში სასამართლოში პირველად სამშაბათს გამოცხადდა. როდესაც მოსამართლემ ჰკითხა, წაიკითხა თუ არა 12-გვერდიანი ბრალდება, მან უპასუხა: "არა თავიდან ბოლომდე".

ის 100,000 დოლარის გირაოს სანაცვლოდ გაათავისუფლეს და სავარაუდოდ, ნიუ-იორკში სასამართლო პროცესს მოგვიანებით დაესწრება. დამნაშავედ ცნობის შემთხვევაში, მას 20 წლით თავისუფლების აღკვეთა ემუქრება.