მიუნხენის "ბაიერნის" კანადელ მცველს, ალფონსო დევისს, მუხლის ჯვარედინი იოგების დაზიანება დაუდგინდა, რაც ოპერაციას საჭიროებს. ტრავმა ფეხბურთელმა კანადის ნაკრების შემადგენლობაში, ამერიკის შეერთებული შტატების წინააღმდეგ გამართულ მატჩში მიიღო. სავარაუდოდ, დევისი მოედანს რამდენიმე თვით დაემშვიდობება.
გარდა ამისა, "ბაიერნის" კიდევ ერთი მცველი, დაიო უპამეკანო, ასევე ტრავმირებულია. მან საფრანგეთის ნაკრების რიგებში ყოფნისას მუხლის პრობლემა იგრძნო და გარკვეული პერიოდი თამაშს ვერ შეძლებს.
"სამწუხაროდ, სანაკრებო პაუზების დროს ყოველთვის არის ტრავმების რისკი და ამჯერად ეს განსაკუთრებით მძიმედ აისახა ჩვენზე," - განაცხადა "ბაიერნის" სპორტულმა დირექტორმა, მაქს ებერლმა. "ჩვენი გუნდი ძლიერია და შეძლებს ამ დანაკლისის შევსებას. ახლა კიდევ უფრო მეტად ვითანამშრომლებთ. ჩვენ გვაქვს საკმარისი პოტენციალი, რომ მიზნების მიღწევა გავაგრძელოთ."
დევისი "ბაიერნის" ღირსებას 2018 წლიდან იცავს და გუნდის მაისურით 226 მატჩი აქვს ჩატარებული. მან მიმდინარე წლის თებერვალში ხელი მოაწერა ახალ, ხუთწლიან კონტრაქტს, რითაც წერტილი დაესვა მის შესაძლო გადასვლაზე მადრიდის "რეალში". უპამეკანომ "ბაიერნში" გადასვლის შემდეგ 147 შეხვედრაში მიიღო მონაწილეობა.
აღსანიშნავია, რომ "ბაიერნი" ბუნდესლიგის სატურნირო ცხრილში ლიდერობს და უახლოეს მდევარს ექვსი ქულით უსწრებს. გუნდი რეკორდული, 34-ე გერმანული ტიტულის მოპოვებას ცდილობს. გარდა ამისა, "ბაიერნი" ჩემპიონთა ლიგის მეოთხედფინალში მილანის "ინტერს" დაუპირისპირდება. პირველი მატჩი მიუნხენში, 8 აპრილს გაიმართება.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს