ხელოვნური ინტელექტის რევოლუციის ლიდერი ჩიპების მწარმოებელი, კომპანია Nvidia, Microsoft-ს გაუსწრო და მსოფლიოში ყველაზე ძვირად ღირებული საჯარო კომპანია გახდა, როგორც ამას CNBC, Guardian, DW და სხვა მედია საშუალებები იუწყებიან. 3.335 ტრილიონი დოლარის საბაზრო კაპიტალიზაციით, Nvidia-ს ლიდერობა ნათლად წარმოაჩენს ხელოვნური ინტელექტის ინდუსტრიის უზარმაზარ პოტენციალსა და ზრდის პერსპექტივებს. 2024 წლის 18 ივნისს, Nvidia-ს აქციების ფასი 3.5%-ით გაიზარდა და 135.58 დოლარს მიაღწია, რამაც კომპანიის საბაზრო კაპიტალიზაცია უპრეცედენტო 3.335 ტრილიონ დოლარამდე აიყვანა და Microsoft-ს მსოფლიოს ყველაზე ძვირად ღირებული კომპანიის სტატუსში გადაასწრო.
ეს მიღწევა განაპირობა კომპანიის დომინირებამ ხელოვნური ინტელექტის ჩიპების ბაზარზე, სადაც მონოპოლისტურად, დაახლოებით 80%-ით აკონტროლებს მონაცემთა ცენტრებში გამოყენებულ ხელოვნური ინტელექტის ჩიპებს. 1991 წელს დაარსებული Nvidia თავდაპირველად თამაშებისთვის გრაფიკული ჩიპების წარმოებაზე იყო ორიენტირებული, სანამ სტრატეგიულად არ გადაერთო ხელოვნური ინტელექტის სფეროზე. კომპანიის აქციების ფასი 2024 წელს 174%-ით გაიზარდა. ინვესტორი, რომელიც 1999 წელს Nvidia-ში 10,000 დოლარს ჩადებდა, დღეს 59 მილიონი დოლარის ღირებულების აქციების მფლობელი იქნებოდა.
Nvidia-ს სტრატეგიული ზრდა შეიძლება მივაწეროთ მის მოწინავე გრაფიკულ პროცესორებს (GPU), რომლებიც აუცილებელი გახდა ხელოვნური ინტელექტის ალგორითმების გასაწვრთნელად და ისეთი ინოვაციური აპლიკაციების ასამუშავებლად, როგორებიცაა გამოსახულების გენერატორები და ჩეთბოტები. კომპანია ამჟამად ხელოვნური ინტელექტის ჩიპების ბაზრის დაახლოებით 70%-ს აკონტროლებს, რაც მას ამ ინდუსტრიაში მნიშვნელოვან გავლენას ანიჭებს და მარეგულირებელი ორგანოების ყურადღებასაც იპყრობს.
2010-იანი წლების შუა პერიოდში, ხელოვნური ინტელექტის მკვლევრებმა დაიწყეს Nvidia-ს GPU-ების გამოყენება, რადგან აღმოაჩინეს, რომ ისინი განსაკუთრებით შეეფერებოდა ხელოვნური ინტელექტისთვის საჭირო მასშტაბური გამოთვლების მართვას. Nvidia-მ მოახდინა საკუთარი პროგრამული უზრუნველყოფის დახვეწა და მისი ადაპტირება ხელოვნური ინტელექტის მოთხოვნებთან, რითაც ინდუსტრიის ლიდერი გახდა, როდესაც ხელოვნური ინტელექტის ბუმი დაიწყო. კონკურენტებმა, როგორებიც არიან AMD და Intel, ვერ შეძლეს დაწევა და ანალიტიკოსები ვარაუდობენ, რომ Nvidia-ს კონკურენტული უპირატესობა წლების განმავლობაში შენარჩუნდება.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს