ყოფილი ოლიმპიელი სნოუბორდისტი, კანადის მოქალაქე რაიან ვედინგი, 43 წლის, ფედერალური საგამოძიებო ბიუროს (FBI) ათ ყველაზე ძებნილ გაქცეულთა სიაში მოხვდა. მას ბრალად ედება ტრანსნაციონალური ნარკოტიკული ქსელის ხელმძღვანელობა, რომელიც გამოირჩეოდა განსაკუთრებული სისასტიკით.
გამოძიების თანახმად, ვედინგი კოლუმბიიდან, მექსიკისა და სამხრეთ კალიფორნიის გავლით, კანადასა და ამერიკის შეერთებულ შტატებში ასობით კილოგრამი კოკაინის გადაზიდვას ხელმძღვანელობდა. ასევე, მას ბრალად ედება ნარკოდანაშაულებრივი საქმიანობის ხელშეწყობის მიზნით რამდენიმე მკვლელობისა და ერთი მკვლელობის მცდელობის ორგანიზება.
ამერიკის შეერთებული შტატები ვედინგის დაკავების ან გასამართლების შესახებ ინფორმაციისთვის 10 მილიონ დოლარამდე ჯილდოს იძლევა.
გამოძიებას მიაჩნია, რომ ის მექსიკაში იმყოფება, თუმცა არ გამორიცხავენ მის ყოფნას აშშ-ში, კანადაში, ლათინური ამერიკის სხვა ქვეყნებში ან სხვაგან.
ცნობილია, რომ ვედინგი 2002 წლის ზამთრის ოლიმპიურ თამაშებზე სოლტ ლეიკ სიტიში კანადის სახელით გიგანტურ სლალომში ასპარეზობდა.
FBI-ის ინფორმაციით, ის იყენებდა ფსევდონიმებს, როგორიცაა "ელ ხეფე", "გიგანტი", "სახალხო მტერი", "ჯეიმს კონრად კინგი" და "ჯესი კინგი".
2024 წლის ივნისში ვედინგსა და მის თანამზრახველს, ასევე კანადის მოქალაქე ენდრიუ კლარკს, 34 წლის, კალიფორნიაში ბრალი წაუყენეს კრიმინალური საქმიანობის გაგრძელებაში, ამ საქმიანობასთან დაკავშირებულ მკვლელობაში, ნარკოტიკულ დანაშაულებში და კოკაინის ფლობის, გავრცელებისა და ექსპორტის შეთქმულებაში.
კლარკი მექსიკის ხელისუფლებამ გასული წლის ოქტომბერში დააკავა და გასულ კვირას მექსიკიდან შეერთებულ შტატებში ექსტრადირებულ 29 გაქცეულს შორის იყო.
აშშ-ის ბრალდებაში ნათქვამია, რომ ვედინგმა და კლარკმა 2023 წლის 20 ნოემბერს კანადის პროვინცია ონტარიოში ორი ოჯახის წევრის მკვლელობა შეუკვეთეს, სამხრეთ კალიფორნიის გავლით მოპარული ნარკოტიკული ტვირთის გამო. FBI-ის ინფორმაციით, ოჯახის კიდევ ერთმა წევრმა სროლას გადაურჩა, თუმცა სერიოზული ფიზიკური დაზიანებები მიიღო.
FBI-ის ცნობით, ვედინგმა და კლარკმა ასევე შეუკვეთეს კიდევ ერთი მსხვერპლის მკვლელობა 2024 წლის 18 მაისს ნარკოტიკული ვალის გამო.
FBI-ის ლოს-ანჯელესის საველე ოფისის დირექტორის მოადგილემ, აკილ დევისმა ხუთშაბათს პრესკონფერენციაზე განაცხადა: "კონკურენტების სავარაუდო მკვლელობები ვედინგს ძალიან საშიშ ადამიანად აქცევს და მისი ათ ყველაზე ძებნილ გაქცეულთა სიაში შეყვანა, სახელმწიფო დეპარტამენტის მიერ შემოთავაზებულ დიდ ჯილდოსთან ერთად, საზოგადოებას ჩვენს პარტნიორად აქცევს, რათა მას დავეწიოთ, სანამ ის ვინმეს საფრთხეს შეუქმნის."
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს