საფრანგეთში მცირეწლოვანი ბავშვის გარდაცვალების საქმეზე ბებია-ბაბუა გაათავისუფლეს

საფრანგეთის ალპებში, 2023 წლის ივლისში მომხდარი ტრაგედიის, ორი წლის ემილ სოლეის გაუჩინარებისა და გარდაცვალების საქმეზე, ბავშვის ბებია და ბაბუა, ფილიპ ვედოვინი და მისი მეუღლე ანა, დაკავებიდან ორი დღის შემდეგ, ბრალის წაყენების გარეშე გაათავისუფლეს.

წყვილთან ერთად, მკვლელობისა და გვამის დამალვის ბრალდებით, დაკავებული იყვნენ მათი ზრდასრული შვილებიც, რომლებიც ხუთშაბათს დილით ასევე გაათავისუფლეს. პროკურორმა ჟან-ლუკ ბლაშონმა განაცხადა, რომ გამოძიებამ დაადგინა: ემილის ტანსაცმელი და ნეშტი ტყეში, სადაც ისინი აღმოაჩინეს, გაზაფხულზე აღმოჩენამდე ცოტა ხნით ადრე გადაიტანეს.

ბლაშონის თქმით, ბავშვის თავის ქალის ანალიზმა აჩვენა "სახის ძლიერი ტრავმის" კვალი, რაც იმაზე მიუთითებს, რომ ემილის გაუჩინარებასა და გარდაცვალებაში შესაძლოა მესამე პირი ყოფილიყო ჩარეული.

მანამდე, გამოძიების ერთ-ერთი ვერსია იყო, რომ ემილი თავისით დაიკარგა და დაცემის შედეგად გარდაიცვალა. ბლაშონის განცხადებით, ოთხივე დაკავებულმა პოლიციის ყველა კითხვას უპასუხა, თუმცა ემილის ოჯახის წევრების გარშემო მიმდინარე გამოძიება ჯერ კიდევ არ არის დასრულებული.

პროკურორმა ხაზგასმით აღნიშნა, რომ ისინი კვლავაც მტკიცედ არიან განწყობილნი, სრულად გამოიკვლიონ ემილის გარდაცვალების გარემოებები. საფრანგეთის კანონმდებლობით, პირი შეიძლება დაკავებული იყოს გარკვეული დროის განმავლობაში, სანამ პოლიცია გადაწყვეტს, შესაძლოა თუ არა მას რაიმე კავშირი ჰქონდეს დანაშაულთან.

ემილის ბებიის ადვოკატის, ჟიულიენ პინელის თქმით, ანა ვედოვინი ამჟამად ისვენებს, რადგან ეს 48 საათი მისთვის ძალიან დაძაბული და რთული იყო. ადვოკატმა ასევე აღნიშნა, რომ მსგავს გამოძიებებში ჩვეულებრივი პრაქტიკაა გარკვეული ვერსიების გამორიცხვა და ოჯახის წევრების შესაძლო მონაწილეობის ვერსია ერთ-ერთი ასეთი მიმართულება იყო, რამაც დაკავება გამოიწვია. ის იმედოვნებს, რომ ეს ვერსია ახლა უკვე შეიძლება გამოირიცხოს.

ემილის ბოლოს 2023 წლის 8 ივლისს ნახეს, როდესაც ორმა მეზობელმა ის დაინახა, როგორ მიდიოდა მარტო ალპების პატარა სოფელ ო-ვერნეს ერთადერთ ქუჩაზე, სადაც ბებია-ბაბუის აგარაკზე იმყოფებოდა. ორი წლის ნახევრის ემილი უეცრად გაუჩინარდა. მეორე დღეს პოლიციამ, ძაღლებმა და სამხედროებმა ასობით ადამიანთან ერთად დაიწყეს ძებნა, მაგრამ ბავშვი თითქოს ჰაერში გაქრა.

მხოლოდ 2024 წლის მარტში იპოვა მოლაშქრემ ემილის ნეშტი სოფლიდან 1 კილომეტრში, ციცაბო, ტყიან ადგილას, სადაც მისვლა ადვილი არ იყო. ბავშვის გაუჩინარებამ და გარდაცვალებამ საფრანგეთი შოკში ჩააგდო და ეს საქმე კვლავაც სათაურებშია.