სასექსის ჰერცოგინიას ახალი Netflix-ის შოუ მეორე სეზონისთვის განახლდა

სასექსის ჰერცოგინიამ განაცხადა, რომ მისი შოუ, სახელწოდებით "სიყვარულით, მეგანი", მეორე სეზონით დაბრუნდება. რვა ეპიზოდიანი შოუ Netflix-ზე ცოტა ხნის წინ გამოვიდა და მასში მეგანი მეგობრებთან და ცნობილ სტუმრებთან ერთად კულინარიულ, მებაღეობისა და მასპინძლობის რჩევებს იზიარებს კალიფორნიის ერთ-ერთ მამულში.

ამას გარდა, ყოფილმა მსახიობმა ოფიციალურად წარადგინა საკუთარი ბრენდი "As Ever", რომლის ვებგვერდზეც უკვე გამოჩნდა პირველი პროდუქტები, მათ შორის ჟოლოს ჯემი და საკონდიტრო მოსაყრელი.

Netflix-ის ოფიციალურმა ვებგვერდმა დაადასტურა, რომ შოუს მეორე სეზონის გადაღებები დასრულებულია და ის შემოდგომაზე გავა ეთერში.

ეს განცხადება პირველი სეზონის კრიტიკული შეფასებების ფონზე გაკეთდა, როგორც დიდ ბრიტანეთში, ასევე აშშ-ში. ზოგიერთმა გამოცემამ შოუ უაზროდ და ნარცისიზმის გამოვლინებად შეაფასა. თუმცა, იყვნენ ისეთებიც, ვინც აღნიშნა, რომ შოუ ესკაპიზმისა და მისწრაფებების შესახებ არის, რომელიც ნაცრისფერ დღეებში ცოტაოდენ ბრწყინვალებას სთავაზობს მაყურებელს.

შოუში მეგანი სხვადასხვა კერძს, საკვებსა და საჩუქრებს ამზადებს მონტესიტოში მდებარე ლამაზ ვილაში, რომელიც მას არ ეკუთვნის. ის ამზადებს პასტას, ბოსტნეულის ასორტს, ფოკაჩას, ფრიტატასა და გამომცხვარ თევზს, ასევე მაყურებელს უზიარებს რჩევებს, თუ როგორ გაახაროს სტუმრები, როგორ მოაწყოს ყვავილები და როგორ გააკეთოს ხელნაკეთი აბაზანის მარილები.

პირველი სეზონის სტუმრებს შორის იყვნენ ამერიკელი მსახიობი და პროდიუსერი მინდი კალინგი, ცნობილი შეფ-მზარეული როი ჩოი, დიზაინერი ტრეისი რობინსი და კოსმეტიკური ბიზნესის მეპატრონე ვიქტორია ჯექსონი.

მეგანმა სოციალურ ქსელში ვიდეო გამოაქვეყნა, სადაც ქუდზე ეწერა "მოდით, სალათი მშვიდად მივირთვათ". წარწერაში კი ეწერა, რომ ის მოხარულია მეორე სეზონის გამოსვლით. მან ასევე მადლობა გადაუხადა გუნდს, რომელმაც შოუს შექმნაში მიიღო მონაწილეობა.

პირველი სეზონის პრემიერა თავდაპირველად იანვარში იყო დაგეგმილი, მაგრამ ლოს-ანჯელესში ხანძრების გამო მარტამდე გადაიდო. Netflix-მა მაშინ განაცხადა, რომ შოუ სამხრეთ კალიფორნიის სილამაზისადმი მიძღვნილი გულწრფელი ხარკია და პრემიერა შეერთებულ შტატებში არსებული "მიმდინარე ნგრევის" გამო გადაიდო.