ავსტრალიის ოქროს სანაპიროზე ქარი მატულობს და ტალღებიც იზრდება. მიუხედავად იმისა, რომ ხელისუფლება მოსახლეობას მოუწოდებს, ციკლონ "ალფრედის" მოახლოებასთან დაკავშირებით სახლებში დარჩნენ, თავგადასავლების მოყვარული სერფინგისტები ამ გაფრთხილებას ყურადღებას არ აქცევენ და მზარდი ქარის მიუხედავად, ტალღებზე სრიალებენ.
სერფინგის მოყვარულები აღნიშნავენ, რომ სწორედ ამინდის ასეთ ცვლილებებს ელოდებიან. კირას სანაპირო, რომელიც ცნობილია თავისი ტალღებით, ამ დღეებში განსაკუთრებით ხალხმრავალია სერფინგისტებით, რომლებიც ძლიერი ქარის გამოყენებას ცდილობენ.
მეტეოროლოგების პროგნოზით, ციკლონი "ალფრედი" სანაპიროს შაბათ დილით, მეორე კატეგორიის სისტემის სახით მიაღწევს. მოსალოდნელია, რომ ქარის სიჩქარე ცენტრში 95 კმ/სთ-ს მიაღწევს, ხოლო ზოგიერთ შემთხვევაში 130 კმ/სთ-მდე გაძლიერდება. სპეციალისტები შიშობენ, რომ ციკლონის შენელებული ტემპის გამო, შესაძლოა, ხანგრძლივი წვიმები და წყალდიდობები გამოიწვიოს.
ციკლონის გავლენის ქვეშ ოთხ მილიონამდე ადამიანი მოექცევა. მოსალოდნელია, რომ ის დაატყდება თავს მზიანი სანაპიროსა და ოქროს სანაპიროს შორის მდებარე ტერიტორიას, რომელიც ავსტრალიის ულამაზესი პლაჟებითა და სერფინგის საუკეთესო პირობებითაა ცნობილი. ასევე, საფრთხე ემუქრება ავსტრალიის მესამე უდიდეს ქალაქ ბრისბენს, სადაც თითქმის 3 მილიონი ადამიანი ცხოვრობს.
სანამ სერფინგისტები ქარისა და ტალღებისგან სიამოვნებას იღებენ, მოსახლეობის უმეტესობა სახლებში იმალება. ბრისბენის სამხრეთით მდებარე ლოგანის მცხოვრებლებმა წყლისა და საკვების მარაგი მოიმარაგეს, ასევე, სახლებში ფანჯრებისგან მოშორებით უსაფრთხო ოთახები მოამზადეს.
კუინზლენდი ხშირად ხდება ციკლონების მსხვერპლი, თუმცა, ასეთი ძლიერი ციკლონის სამხრეთით გავრცელება იშვიათია. ციკლონ "ალფრედის" შედეგად, მოსალოდნელია 800 მმ-მდე ნალექი, რაც სამხრეთ კუინზლენდისა და ჩრდილოეთ ახალი სამხრეთ უელსის დიდ ტერიტორიაზე იმოქმედებს. დაბლობ რაიონებში წყალდიდობის საფრთხე განსაკუთრებით მაღალია.
პრემიერ-მინისტრმა ხაზგასმით აღნიშნა, რომ ავსტრალიელები ამ გამოწვევას გაუძლებენ. ახალი სამხრეთ უელსის პოლიციის ინფორმაციით, ერთი მამაკაცი დაკარგულად ითვლება, მას შემდეგ, რაც მისი ავტომობილი სწრაფ მდინარეში გადავარდა.
ამ დროისთვის, ორ შტატში 84 000-ზე მეტ სახლს ელექტროენერგია არ მიეწოდება, ხოლო ათი ათასობით ადამიანი ევაკუირებულია. დაიხურა თითქმის 1000 სკოლა, შეჩერებულია საზოგადოებრივი ტრანსპორტის მოძრაობა და აეროპორტები. ავიარეისების განახლება კვირამდე არ იგეგმება. ასევე, გაუქმებულია დაგეგმილი ოპერაციები.
ხელისუფლება მოსახლეობას ციკლონ "ალფრედისთვის" მოსამზადებლად ეხმარება. რეგიონის მასშტაბით, მოქმედებს ქვიშის ტომრების დარიგების პუნქტები, რათა მოსახლეობამ საკუთარი სახლების დაცვა შეძლოს.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს