ამერიკელმა ბლოგერმა, რომელიც ავსტრალიაში პატარა ვომბატის დედისგან მოშორების ამსახველ ვიდეოში გამოჩნდა, საზოგადოების მწვავე კრიტიკა დაიმსახურა. გავრცელებული ინფორმაციით, მომხდარის შემდეგ მას სიცოცხლის მოსპობითაც კი ემუქრებოდნენ.
ინციდენტი გზის პირას მოხდა, სადაც ბლოგერმა ვომბატის ლეკვი აიყვანა და მანქანისკენ გაიქცა, რასაც დედის შეშფოთებული რეაქცია მოჰყვა. ამ ფაქტმა ავსტრალიაში დიდი აღშფოთება გამოიწვია. ქვეყნის პრემიერ-მინისტრმაც კი გააკრიტიკა ბლოგერის საქციელი.
ბლოგერმა სოციალურ ქსელში განცხადება გაავრცელა, სადაც მომხდარის გამო ბოდიში მოიხადა და განმარტა, რომ ცხოველების გზის სავალი ნაწილიდან გადაყვანას ცდილობდა. მისი თქმით, დედა ვომბატი გზიდან გადავიდა, ლეკვი კი დარჩა, ამიტომ აიყვანა იგი. მან ასევე აღნიშნა, რომ გაქცევა დედის თავდასხმის შიშმა გამოიწვია და არა ლეკვისთვის დედის წართმევის განზრახვამ. ბლოგერი ამტკიცებს, რომ მისი ქმედება სპონტანური იყო და არც დადგმული ყოფილა და არც გასართობად იყო გამიზნული.
განცხადების მეორე ნაწილში ბლოგერი ავსტრალიაში ცხოველების, მათ შორის ვომბატების, კენგურუების, ცხენების, ირმებისა და ღორების განადგურების კანონებს აკრიტიკებს. ავსტრალიაში არსებული ცხოველების განადგურების კანონები ხშირად იწვევს კამათს და საზოგადოების აზრთა სხვადასხვაობას. ვომბატები, რომლებიც ავსტრალიის ენდემური სახეობაა, დაცულ ცხოველებად ითვლებიან, თუმცა საჭიროების შემთხვევაში მათი განადგურების ნებართვის აღება შესაძლებელია.
ავსტრალიაში მომხდარმა ინციდენტმა იმდენად დიდი რეზონანსი გამოიწვია, რომ შინაგან საქმეთა მინისტრი ბლოგერისთვის ვიზის გაუქმების საკითხსაც კი განიხილავდა. თუმცა, გავრცელებული ინფორმაციით, ბლოგერმა ქვეყანა საკუთარი ნებით დატოვა.
გსურთ კომენტარის დატოვება?
კომენტარის დასატოვებლად საჭიროა ავტორიზაცია
შესვლა რეგისტრაციაკომენტარები არ არის
იყავით პირველი, ვინც დატოვებს კომენტარს