ბარსელონას 70 კვადრატული მეტრის ბინა კალიფორნიულ ელეგანტურობას აერთიანებს

„ეს დამკვეთები სან-ფრანცისკოში ცხოვრობენ, მაგრამ ბარსელონასთან ძალიან ძლიერი კავშირი აქვთ. მათ სურდათ სივრცე, რომელიც ორივე ადგილს განასახიერებდა – ასახავდა მათ კალიფორნიულ იდენტობას, მაგრამ ამავე დროს ბარსელონაში იქნებოდა გადმოტანილი“, – აცხადებს MA&Partners-ის კომუნიკაციების ხელმძღვანელი, ალდრიკ იბორა. ქალაქის ცენტრში, მთებსა და ზღვას შორის მოქცეული ბარსელონას ეს ბინა იდეალური დროებითი საცხოვრებელია. არქიტექტურაზე, მშენებლობასა და დიზაინზე პასუხისმგებელმა MA&Partners-მა, ასევე მოიწვია ინტერიერის დიზაინის სტუდია Santa Living-ი, რათა მათი გამოცდილებითა და ხედვით შეექმნათ პატარა, მაგრამ უნიკალური ხასიათის მქონე სახლი. რემონტი რეკორდულ დროში დასრულდა. „პროექტის დასრულებას და გადაცემას ექვს თვეზე ნაკლები დასჭირდა“, – იხსენებს იბორა. „ბინა ერთგვარ უტოპიურ ადგილად, გამორჩეულ თავშესაფრად იქცა“. დამკვეთების გემოვნებისა და ესპანური ელეგანტურობის ახალი ინტერპრეტაციის შესაბამისად ჭკვიანურად დაგეგმარებული სახლი, ტიპური სასტუმროს დიზაინის ალტერნატიულ ხედვას გვთავაზობს. „ჩვენ გვინდოდა შეგვექმნა სივრცე, რომელიც ფუფუნების სასტუმროს ყველა კომფორტს მოიცავდა, და ამავდროულად, კლიენტები თავს შინაურულად იგრძნობდნენ.“ ბინის სამხრეთ ტერასაზე განთავსებულია Heaps & Woods-ის Pitufi-ს ლაუნჯის სავარძელი, Allegra-ს ყავის მაგიდა (Heaps & Woods), Santa & Cole-ს Cesta-ს სანათი, Canoa Lab-ის Deriva-ს კერამიკა და ბალიშები Kover Studio-დან და Santa Living-დან.