ბერნი ეკლსტოუნმა ავტომობილების კოლექცია რეკორდულ ფასად გაყიდა

ფორმულა 1-ის ყოფილმა ხელმძღვანელმა, ბერნი ეკლსტოუნმა, თავისი ისტორიული ავტომობილების კოლექცია Red Bull-ის მემკვიდრეს, მარკ მატეშიცს რეკორდულ ფასად მიჰყიდა. 94 წლის ეკლსტოუნმა 2024 წლის ბოლოს განაცხადა, რომ 69 ავტომობილისგან შემდგარ კოლექციას გაყიდდა. კოლექციაში შედის ისეთი ლეგენდარული ავტომობილები, რომლებსაც ფორმულა 1-ის მსოფლიო ჩემპიონები, ნიკი ლაუდა, მაიკ ჰოთორნი და მიხაელ შუმახერი მართავდნენ. ასევე, კარლოს პაჩეს, ლაუდასა და ნელსონ პიკეს მიერ მართული Brabham-ის მარკის ავტომობილები და Brabham-Alfa Romeo, რომელიც მხოლოდ ერთხელ გამოიყენეს რბოლაში. მიუხედავად სხვადასხვა საინვესტიციო ფონდების ინტერესისა, ეკლსტოუნის კოლექცია Red Bull-ის დამფუძნებლის, დიტრიხ მატეშიცის მილიარდერმა ვაჟმა შეიძინა, რომელმაც პირობა დადო, რომ კოლექციას საზოგადოებისთვის ხელმისაწვდომს გახდის. მიუხედავად იმისა, რომ უცნობია, რა თანხა გადაიხადა მატეშიცმა ავტომობილებში, გამყიდველმა ტომ ჰარტლი უმცროსმა განაცხადა, რომ ეს იყო "ავტომობილების კოლექციონირების სამყაროში ოდესმე დადებული ყველაზე დიდი ერთჯერადი გარიგება". გავრცელებული ინფორმაციით, კოლექციის ღირებულება დაახლოებით 500 მილიონი ფუნტი სტერლინგია. ეკლსტოუნმა Reuters-თან საუბარში აღნიშნა, რომ მოხარულია, რომ ავტომობილები კარგ ხელში გადავიდა და მათ მუზეუმში გამოფენენ, რათა ხალხს მათი ნახვის საშუალება მიეცეს. მატეშიცმა, რომელმაც მამის გარდაცვალების შემდეგ Red Bull-ის 49%-იანი წილი მიიღო მემკვიდრეობით, განაცხადა, რომ მოხარულია, რომ ეკლსტოუნმა მას ანდო ამ ისტორიულად მნიშვნელოვანი კოლექციის მოვლა. მისი თქმით, კოლექციას სათუთად შეინახავენ, წლების განმავლობაში გააფართოებენ და უახლოეს მომავალში შესაბამის ადგილას საზოგადოებისთვის ხელმისაწვდომს გახდიან. ეკლსტოუნმა 2023 წელს საგადასახადო სამსახურთან დადებული სამოქალაქო შეთანხმების საფუძველზე დაახლოებით 653 მილიონი ფუნტი სტერლინგი გადაიხადა. მან განმარტა, რომ ავტომობილების კოლექციის გაყიდვის გადაწყვეტილება იმით იყო განპირობებული, რომ არ სურდა ეს ტვირთი მეუღლისთვის, ფაბიანასთვის დაეტოვებინა.