ტაილანდში მოსწავლეებს თმის ვარცხნილობის არჩევის თავისუფლება მიეცათ

ტაილანდში, სასამართლოს გადაწყვეტილებით, მოსწავლეებს თმის ვარცხნილობის არჩევის უფლება მიეცათ. უზენაესმა ადმინისტრაციულმა სასამართლომ გააუქმა განათლების სამინისტროს 50-წლიანი დირექტივა, რომელიც სკოლის მოსწავლეებისთვის თმის ვარცხნილობის წესებს ადგენდა. აღნიშნული დირექტივა ბიჭებისთვის მოკლე ვარცხნილობას, ხოლო გოგონებისთვის ყურებამდე სიგრძის ბობს ითვალისწინებდა.

მართალია, ბევრ სკოლაში ეს წესები თანდათანობით შემსუბუქდა, თუმცა ზოგიერთი სასწავლო დაწესებულება კვლავ 1975 წელს გამოცემულ დირექტივას იყენებდა და მოსწავლეებს, რომლებიც მას არ ემორჩილებოდნენ, თმას აჭრიდნენ. სასამართლომ განაცხადა, რომ 1975 წლის დირექტივა ეწინააღმდეგება კონსტიტუციით დაცულ ინდივიდუალურ თავისუფლებებს და არ შეესაბამება თანამედროვე საზოგადოებას.

სასამართლოს გადაწყვეტილება 2020 წელს 23 საჯარო სკოლის მოსწავლის მიერ შეტანილ პეტიციას მოჰყვა, სადაც ისინი ამტკიცებდნენ, რომ 1975 წლის დირექტივა არაკონსტიტუციური იყო. სტუდენტები და აქტივისტები დიდი ხანია იბრძვიან თმის ვარცხნილობის წესების შემსუბუქებისთვის, რადგან მიაჩნიათ, რომ ეს არღვევს მათ ადამიანურ ღირსებასა და სხეულის თავისუფლებას.

2020 წელს განათლების სამინისტრომ მოსწავლეებს უფრო გრძელი ვარცხნილობების ტარების უფლება მისცა, თუმცა გარკვეული შეზღუდვები მაინც არსებობდა. ბიჭებს თმა კისრის უკანა ნაწილს არ უნდა ფარავდეს, ხოლო გოგონებს გრძელი თმა აკრეფილი უნდა ჰქონოდათ. ეს რეგულაციები 2023 წელს გაუქმდა და მაშინდელმა განათლების მინისტრმა განაცხადა, რომ მოსწავლეებმა, მშობლებმა და სკოლის ადმინისტრაციამ უნდა შეათანხმონ, თუ რა არის მისაღები თმის ვარცხნილობა მათ სკოლებში.

მიუხედავად ამ ცვლილებებისა, ზოგიერთი სკოლა კვლავ 1975 წლის დირექტივით ხელმძღვანელობდა. სკოლებში ტრადიციულად მიაჩნდათ, რომ მოკლე თმა დისციპლინისა და მოწესრიგებულობის სიმბოლოა. თუმცა, ბოლო წლებში სკოლებში ჩოლკებისა და შეღებილი თმის აკრძალვამ ტაილანდში საზოგადოების აღშფოთება გამოიწვია. ქვეყნის ზოგიერთ ნაწილში მასწავლებლები მოსწავლეებს თმის ვარცხნილობის წესების დარღვევისთვის დილის შეკრებაზე უხარისხოდ აჭრიდნენ თმას.

მიმდინარე წლის იანვარში განათლების სამინისტრომ კიდევ ერთხელ განაცხადა, რომ გააუქმა თმის სიგრძის შეზღუდვები ყველა მოსწავლისთვის და აღიარა "განათლების ყველა ასპექტში მრავალფეროვნებისა და სამართლიანობის ხელშეწყობის მნიშვნელობა". სასამართლოს გადაწყვეტილება ასევე ხაზს უსვამს, რომ სკოლების თმის ვარცხნილობის წესები მოსწავლეების თავისუფლებასა და ღირსებას უნდა ითვალისწინებდეს.

მიუხედავად ამისა, ზოგიერთი აქტივისტი შიშობს, რომ ეს გადაწყვეტილება სკოლებს საკუთარი წესების დაწესების საშუალებას დაუტოვებს, განსაკუთრებით იქ, სადაც უფრო კონსერვატიული მმართველობაა. თუმცა, ისინი იმედოვნებენ, რომ სასამართლოს გადაწყვეტილება სკოლებში ადამიანის ძირითადი უფლებების შესახებ ახალ სტანდარტს დაამკვიდრებს.