ცხოვრება „ლაიქების“ გარეშე: ტიმ კუკის მოტივაციური გზავნილი სტუდენტებს

„თქვენი გავლენა საზოგადოებაზე გაზომეთ არა „მოწონებებით“, არამედ იმ ადამიანების რაოდენობით, ვისაც შეეხეთ, არა პოპულარობით, არამედ იმით, თუ რამდენად ემსახურებით სხვებს,“ – ეს სიტყვები ტიმ კუკმა 2017 წელს მასაჩუსეტსის ტექნოლოგიური ინსტიტუტის (MIT) კურსდამთავრებულებთან გამოსვლისას წარმოთქვა. Apple-ის აღმასრულებელმა დირექტორმა ახალგაზრდებს მოუწოდა, გრანდიოზული მიზნების მისაღწევად მაქსიმალურად გამოეყენებინათ საკუთარი გონება, შესაძლებლობები და გული. მან ასევე ურჩია მათ, საქმის კეთების პროცესში მორალური პრინციპები დაეყენებინათ უპირველეს ყოვლისა.

ტიმ კუკმა გაიხსენა ახალგაზრდობის პერიოდი, როდესაც ცხოვრების მიზნის ძიებაში აქტიურად ცდილობდა საკუთარი თავის რეალიზებას. ამ მიზნით, დიუკის უნივერსიტეტში მედიტაციას, რელიგიასა და ფილოსოფიასაც კი სწავლობდა. მან იხუმრა საკუთარ „ახალგაზრდულ გატაცებებზეც“, როდესაც Windows PC-ზე ექსპერიმენტებს ატარებდა, რაც არც ისე წარმატებული აღმოჩნდა. კუკმა ასევე გაიზიარა Apple-ში საკუთარი მოწოდების პოვნის ისტორია, რომელიც 1997 წელს დაიწყო. სწორედ მაშინ შეხვდა სტივ ჯობსს, რომელსაც ტექნოლოგიების ადამიანთა საკეთილდღეოდ გამოყენების იდეა ატყვევებდა.

ტიმ კუკმა სტუდენტებს მოუწოდა, საკუთარი ღირებულებები და ჰუმანურობა ჩადონ ყველაფერში, რასაც ქმნიან. მისი თქმით, რომის პაპმა ფრანცისკემ ერთხელ უთხრა: „კაცობრიობას არასდროს ჰქონია ასეთი ძალა, თუმცა არ არსებობს გარანტია, რომ მას გონივრულად გამოვიყენებთ“.

„თუ თქვენ ისწრაფვით იცხოვროთ სამყაროში, სადაც ტექნოლოგია ემსახურება ადამიანებს, თუ თქვენი მიზანია მაქსიმალურად გამოავლინოთ საკუთარი პოტენციალი და იზრუნოთ არა ვიწრო ჯგუფზე, არამედ მთლიანად საზოგადოებაზე, მაშინ კაცობრიობას აქვს იმედი…“ – განაცხადა ტიმ კუკმა.

ტიმ კუკი Apple-ის სათავეში 2011 წლიდან მოღვაწეობს. მისი ხელმძღვანელობით კომპანიამ ისეთი ინოვაციური პროდუქტები გამოუშვა, როგორიცაა Apple Watch და HomePod.