თურქეთში საპროტესტო აქციები გრძელდება, დაკავებულია ათასზე მეტი ადამიანი

თურქეთში უკვე მეშვიდე ღამეა საპროტესტო აქციები მიმდინარეობს. ამ დროის განმავლობაში, სამართალდამცავებმა ათასზე მეტი ადამიანი დააკავეს, მათ შორის სტუდენტები, ჟურნალისტები და ადვოკატები.

სახალხო მღელვარება გასულ ოთხშაბათს დაიწყო, მას შემდეგ, რაც სტამბოლის მერი, ეკრემ იმამოღლუ, რომელსაც პრეზიდენტ რეჯეფ თაიპ ერდოღანის მთავარ პოლიტიკურ ოპონენტად მიიჩნევენ, კორუფციის ბრალდებით დააკავეს.

ადამიანის უფლებათა დამცველმა ორგანიზაციებმა და გაერომ დაგმეს დაკავებები და პოლიციის მხრიდან მომიტინგეების მიმართ ძალის გადამეტება. იმამოღლუს განცხადებით, მის წინააღმდეგ წაყენებული ბრალდებები პოლიტიკურად მოტივირებულია, რასაც თურქეთის პრეზიდენტი უარყოფს.

ანკარაში, რამადანის მარხვის გატეხვისას ახალგაზრდებთან შეხვედრაზე, პრეზიდენტმა ერდოღანმა მოთმინებისკენ და საღი აზრისკენ მოუწოდა, იმ ფონზე, რასაც მან "ძალიან მგრძნობიარე დღეები" უწოდა. მან ასევე დასძინა, რომ "იმ ადამიანებს, რომლებსაც სურთ ამ ქვეყნის ქაოსის ადგილად გადაქცევა, წასასვლელი არსად აქვთ" და რომ მომიტინგეების მიერ არჩეული გზა "ჩიხია".

სტამბოლში, ათასობით სტუდენტი შეიკრიბა მაჩკას პარკში და შემდეგ შიშლის მიმართულებით გაემართა. ხელისუფლებამ სტამბოლში საპროტესტო აქციები აკრძალა და ზოგიერთი გზა გადაკეტა, "საზოგადოებრივი წესრიგის დაცვისა" და "შესაძლო პროვოკაციული ქმედებების თავიდან აცილების" მიზნით.

როდესაც სტუდენტები ნიშანთაშის რაიონში მიემართებოდნენ, ისინი სკანდირებდნენ "მთავრობა, გადადექი!" და დროშებსა და ბანერებს აფრიალებდნენ, რასაც პოლიციის დიდი რაოდენობა აკვირდებოდა. ბევრ სტუდენტს სახე შარფებით ან ნიღბებით ჰქონდა დაფარული და აღიარებდნენ, რომ პოლიციის მიერ იდენტიფიცირების ეშინოდათ.

თურქეთის მთავარმა ოპოზიციურმა პარტიამ, რესპუბლიკურმა სახალხო პარტიამ (CHP), განაცხადა, რომ სტამბოლის მერიის წინ გამართული აქცია ბოლო იყო ღამის შეკრებების სერიაში და რომ ისინი შაბათს ქალაქში დიდ აქციას გეგმავენ.

"მზად ხართ შაბათს სტამბოლის დიდ მოედანზე დიდი აქციისთვის?" - მიმართა ოზგურ ოზელმა შეკრებილებს. "იმამოღლუს მხარდასაჭერად, მისი დაპატიმრების გასაპროტესტებლად, თითოეული ჩვენი მერის დაკავების გასაპროტესტებლად. გამჭვირვალე, ღია, პირდაპირი ტრანსლაციის სასამართლო პროცესების მოთხოვნისთვის, იმის სათქმელად, რომ დავიღალეთ და ვადამდელი არჩევნები გვინდა."

თურქეთის შინაგან საქმეთა მინისტრის განცხადებით, გასული ოთხშაბათიდან მოყოლებული, დემონსტრაციების შემდეგ 1418 მომიტინგე დააკავეს, რომლებსაც მთავრობა "უკანონოდ" მიიჩნევს. ალი იერლიკაიამ სოციალურ ქსელში დაწერა: "ამჟამად დაკავებულია 979 ეჭვმიტანილი, დღეს სასამართლოს წინაშე 478 ადამიანი წარდგება. არანაირი დათმობა არ იქნება იმ ადამიანებთან, რომლებიც ცდილობენ ქუჩების ტერორიზებას, ჩვენს ეროვნულ და მორალურ ფასეულობებზე თავდასხმას და ჩვენს პოლიციელებზე თავდასხმას."

გარდა ამისა, სასამართლოს წინაშე შვიდი ჟურნალისტი გამოცხადდა, მათ შორის AFP-ის საინფორმაციო სააგენტოს ფოტოგრაფი იასინ აკგიული, რომელიც დემონსტრაციებს აშუქებდა. AFP-ის თავმჯდომარემ, ფაბრის ფრისმა, თურქეთის პრეზიდენტს წერილი მისწერა და ერდოღანს მოუწოდა, "ჩაერიოს" აკგიულის დაპატიმრებაში, რაც მან "მიუღებლად" შეაფასა.

იმამოღლუ გასულ კვირას 100-ზე მეტ ადამიანთან ერთად დააკავეს გამოძიების ფარგლებში. სხვა დაპატიმრებულებს შორის იყვნენ პოლიტიკოსები, ჟურნალისტები და ბიზნესმენები. მისი დაპატიმრება ხელს არ უშლის მის კანდიდატურას ან პრეზიდენტად არჩევას, მაგრამ ის ვერ შეძლებს კენჭისყრას, თუ მის წინააღმდეგ წაყენებულ რომელიმე ბრალდებაში დამნაშავედ ცნეს.

ოპოზიციონერი მერი ერდოღანის ერთ-ერთ ყველაზე ძლიერ მეტოქედ ითვლება, რომელიც თურქეთის სათავეში 22 წელია იმყოფება, როგორც პრემიერ-მინისტრი, ასევე პრეზიდენტი. ერდოღანის უფლებამოსილების ვადა 2028 წელს იწურება და მოქმედი წესების მიხედვით, მას ხელახლა კენჭისყრა არ შეუძლია - მაგრამ მას შეუძლია ვადამდელი არჩევნების დანიშვნა ან კონსტიტუციის შეცვლა, რათა ხელისუფლებაში უფრო დიდხანს დარჩეს.

თურქეთის იუსტიციის სამინისტრომ გააკრიტიკა ისინი, ვინც ერდოღანს დაკავებებს უკავშირებს და ხაზი გაუსვა სასამართლო ხელისუფლების დამოუკიდებლობას. თავისუფლება და დემოკრატია თურქეთში სტაბილურად იკარგება.